چاپ کتاب حشمت به نثر هورامی توسط نویسنده نوجوان سپهر شمس

 

 

سپێهری 12 ساڵه کتێب‌ داستانێوش به‌ زوانی هه‌ورامی نویست‌ و پێشکه‌شش که‌ردٚ‌ به‌ کتێبخانه‌و هه‌وراما

ئه‌شناساو کتێبوو حشمه‌تی

نامێ کتێبی:  حشمەت   
بابەت: حەکایەتێ
نویسەر: سپێهر شەمس   
ڕازنەروو ڕووبەرگی: سه‌عید شه‌مس
ڕازنه‌روو ده‌نگی(صدابردار): که‌یوان موساعێد
چاپ و پەخش: زایەڵە    
ساڵەو چاپوو ئەوەڵی: 1400    
تیراژ: 500 جلدێ  
شابک:  978-622-7772-06-7
شماره کتابشناسی ملی :  ۸۴۲۹۴۹۶
قیمه‌توو کتێبی چنی سی دی ده‌نگوو نویسه‌ری: 40 هه‌زار تمه‌نێ

 

چن خه‌تێو جه‌ باره‌و کتێبوو حشمه‌تی
✍️: ئیبراهیم شه‌مس

هه‌ر پاسه که‌‌ نویسه‌ر  جه‌ وه‌ڵینه‌و کتێبه‌که‌یه‌نه‌ نویسه‌نش، حشمه‌ت داستانه‌و کوڕێویا که‌ سنعش ئینا ویس ساڵێنه‌، یانه‌ و مه‌دره‌سه‌ش جیا ئاسه‌ن و ته‌نیا ژیوای به‌رۆ سه‌ر. دلێ ئی داستانێنه‌ ئێمه‌ چنی چن دانا شه‌خسیه‌تا سه‌روکارما هه‌ن. حشمه‌ت، ئه‌دٚاش و تاته‌ش و واڵێ و براڵه‌که‌ش، ڕه‌فێقێوش به‌ نامێو موحسێنی، لالۆ تۆفێقش، ئاغه‌ی ره‌سووڵی موعه‌للێموو ڕیازیش، ئۆساکاره‌که‌ش، زه‌ماکه‌شا حه‌یده‌ر، هامسای تازه‌شا، ئه‌ولحه‌کیم، ئاغا جه‌مشیدی کارگه‌ردان و چن ره‌فێقێ ته‌رێش.
ئی شه‌خسیه‌تێ دلێ داستانه‌کێنه‌  فره‌ عال سه‌روو یاگێو وێشاوه‌ هورچنیا‌ینێ. چوون ئی داستانێ په‌ی هامساڵاو نویسه‌ری یانێو په‌ی زاڕۆڵاو ده‌وره‌و ده‌بیرستانی نویسیاینه‌، مشیۆ داستانێوه‌ی ته‌ربیه‌تیه‌ و په‌یام داره‌ بۆ په‌س هه‌ر شه‌خسیه‌تێو نمادوو چێوێویا:
حشمه‌ت وێش نمادوو کوڕێوی ساده‌ و زرێنگیا که‌ هه‌ر چن تووشوو گێچه‌ڵا مه‌ی، به‌ڵام ئه‌هلوو خه‌لافی نیا و مووچیاری گوشگێرا و ئاخرش کاره‌که‌شه‌نه‌ سه‌رگنۆ.
موحسێن: نمادوو ڕه‌فێقی هه‌میشه‌ییا که‌ جارجار کارێ لارێ که‌رۆ به‌ڵام نه‌ ئاننه‌ که‌ ده‌ردسه‌ر وه‌ش که‌رۆ په‌ی حشمه‌تی. ئه‌وه‌ڵ تا ئاخروو ئی داستانێ، موحسێن ئینا چنی حشمه‌تی.
ئاغه‌ی ره‌سووڵی نمادوو دانش و ژیری و مووچیاری که‌ردٚه‌یا که‌ حشمه‌تی ته‌شوێق که‌رۆ بلۆ شۆنه‌و ده‌رز وانایه‌ره‌.
ساڵح هامسای تازه‌، نمادوو پیای شه‌ڕئاشۆیا که‌ ته‌نیا زۆر حاڵیش بو.
حه‌مزه‌ برای گه‌وره‌و حشمه‌تی نمادوو ئێنسانی ژیر و نتم و ئارامیا که‌ ره‌فتار و قسێش با به‌ مایه‌و ئارامشی.
و...
لالۆ تۆفێقش نمادوو خه‌سیسی و له‌جه‌ریا و فره‌و ئی کتێبیه‌نه‌ نه‌قشش دیارا و ئه‌وه‌ڵش به‌ پیسکه‌یی و له‌جه‌ری ئادٚی ده‌س پنه‌ که‌رۆ و ئاخروو داستانێچ به‌ گێرته‌ی کرۆنای جه‌ پۆسوو خه‌سیسیه‌نه‌ به‌ر مه‌ی.
هه‌ر چن ئی داستانێ ڕه‌وایه‌تیه‌نه‌ و مه‌تاوۆ بلۆنه‌ قاڵبوو ڕومانێ، به‌ڵام هه‌میه‌تش ئانا چانه‌ که‌ کوڕێوی 12 ساڵه‌ی نویسێنه‌. سپێهر هه‌ر پاسه‌ که‌ وێش کتێبه‌که‌نه‌ نویسه‌نش، وانای و نویسه‌ی به‌ هه‌ورامی فێر بیه‌ن چوون عه‌لاقه‌ش به‌ داستان نویسی فره‌ن، داستانه‌و حشمه‌تیش به‌ هه‌ورامی نویسێنه‌. ئه‌نگیزه‌یچش ئانه‌ بێ یه‌ک ڕۆ مه‌ریوانه‌نه‌ وه‌ڵاوگاو زایێڵه‌ینه‌ چه‌مش که‌وت کوڕێوی 14 ساڵه‌ی کتێب داستانێوش به‌ زوانی فارسی نویسه‌بێ و چاپش که‌ردٚه‌بێ. به‌ڵام سپێهر به‌ هه‌ورامی نویسش و وێش نویسه‌نش مه‌به‌سم جه‌ نویسه‌ی ئی کتێبیه‌ ئانه‌ن تا هامساڵه‌کێم نویسه‌ی و وانای به‌ زوانی هه‌ورامی فێرێ با.

جه‌ ئاخره‌و یاگێش هه‌نه‌ ده‌سوه‌شی تایبه‌ت کریۆ جه‌ دوسێ ئازیزی هونه‌رمه‌ند که‌یوان موساعێد ئوستادوو سه‌دابه‌رداری که‌ به‌ حه‌وسه‌ڵه‌ کتێبه‌که‌و حشمه‌تیش به‌ ده‌نگوو سپێهری تومار که‌ردٚه‌ن.

و ته‌مه‌ننام هه‌نه‌ جه‌ ته‌ماموو ئه‌دٚا و تاتاو هه‌ورامانی با زاڕۆڵه‌کاما فێرێ نویسه‌ی به‌ زوانی هه‌ورامی که‌رمێ چوون گه‌وره‌ته‌رین چێوێو که‌ متاوۆ جه‌ فه‌وتیای زوانی وه‌رگیری که‌رۆ، ئه‌شق و وه‌شه‌ویسی ئی زوانینه‌ جه‌ دڵوو زاڕۆڵانه‌ و ئانه‌ که‌ بتاوا پنه‌ش بنویسا و بواناشه‌و. زوانێو که‌ دایێم پنه‌ش بنویسیۆ ، هیچوه‌خت مه‌فه‌وتیۆ.

http://t.me/Daneshnameh_shams