(چەنی جە خێرئامای مانگەو ڕەمەزانینە بیمێ و چەنی خێرئامایش وەنەكەرمێ)

نویسه‌ر: هێدایه‌ت هه‌ورامی/ مه‌لازاده‌

هەورەكەی ڕەحمەت ڕووی سەمای كەرەم

صەڵات و سەلام كەی كەم؟ ئیسە كەم

بێـــرێ و بــڕێــژێ بـدا وە هــەمـــدا

وە ســـەر مـــەزرعەی ڕۆحی خاتەمدا

ســـەر وازكا ســـەراو وە هەر شەتاو دا

وە ســەر سۆزەی پاك ئال و ئەصحـاودا

*وەڵێ گرد چیوینە مانگەو ڕەمەزانی مانگێوە ڕۆح سوك و ئێسك سوكەنە، ڕەزا شیرینەنە، پەڕەنە خەیرو بەرەكەت، مانگەو لەش ساقیەنە (حەر كەس گەرەكشا لاشەش ساق بۆ، ئانە با ڕۆچێ گێرۆ، مانگەو پاك بیەیۆنە جە گوناحەكاما، مانگەو تەحصیل حاسڵاتینە، مانگەو قورئانوانای و دەوركەردەیۆنە، مانگەو خەیرێ و سەڎەقە كەردەینە، مانگەو دڵەكانە هەكە وێشا پاكو پوخت و بێگەرد و زاخاو بڎاوە، حەرچی پیسی و چەپەڵی و ژەنگوژار هەن گرڎی فرە بڎا، جە (خەشمێ و قینێ و چەمچنۆكی وچەم پیسی وغەیبەتی و حەسودی و جاسوسی كەردەی سەرو یۆترینیۆ) چینیشا گرڎی وێشا پاككەراوە..

مانگەو بەخشاینە و مانگە پاككەردەیۆمڵكو ماڵیا بە زەكات دایشا، مانگەونماكەردەینە ( نماو تەراویحاو نماو صەلات و تەزبیحینە) و مانگەو عیبادەتی و خوائشناسایا، مانگەو زیكرو تەلیلەینە ، مانگەو دڵئارامی و وازئاردەین جە گرد چێوە دنیاییەكا و وێ خەریككەردەی و وكۆڵكەردەیا پەی ئەولای و ڕاو ئەولای و عاقیبەت خەیری و ڕوو سوری و سەرفرازی و سەربەرزی جە حزورو دروسكەرو بەدیئاوردەینە.. يانى مانگەو حەولوتەقەلا دای پەی ژیوایێ حەتا حەتایی تەری.. مانگەوئاوەڎانی ڕۆح و گیانەكانە، پاككەردەیشاو زاخاودایشا ، دما جار سافوبێگەرڎ كەرڎەی دڵ ودەرونی و ناخەكا پەی جوانتەر ژیوای چی دنیێ فانیێنە تا تاویۆ فرە جوانتەرو خاستەرئاینزاكێ و ئاڎەمیەكێ پێوەرە ژیواو ژیوای كەرا..حەتا زیاتەر ئی دنیێ خاس و ئاوەڎانكەراوە، حەر پاسە ئی مانگێ مانگەو دەسگرۆییكەردەی فەقیرو هەژارانە ، ماڵوسەروەت و سامان بەخشای پەنە شاو داوەت كەردەیشا پەی سەرو سفرەو خوانی.. حەر پاسە ئی مانگێ مانگەو زارۆڵە چەمگەشەكانە مزگی پاڎیشاوە جواناو ئاوەڎانكریۆوە.

مانگەو چەنەویەردەینە جە گرد حەقو مافێت هەكە چەنەت زەوت كریان و حەقشا واردەنی و مافت وریان، هەكە مشۆم بڎاتۆو ، وەلێ مەتاواو نیاشا بڎاتۆ، تۆیچ حەقا وەرو خاترەو خوای وئی مانگە مبارەكێ و پەڕ فەرو بەرەكەتێ، جە ماف وحەق و وێت وەش بی، چوون حەتا فرەتەربەخشی چ ماڵ بۆ چ سەروەت بۆ، چ مافی زەوتكریا و وێت بۆ.

زیاتەر دڵت ئارامو وەشو ڕۆحت زیاتەرئاسودە بۆ..

فرسەتا مشۆم قولێ و چاكێ مەردایەتی وركەری و ئی هەلەتە چەنە دەس(كیس)بەرنەشۆ، كێ ماچۆ مەنمێ تا مانگەكێ تەمامنمێ، یام كێ ماچۆ ساڵێ تەر بۆوە مێمانما، پەوكای مشۆم وێما حازر كەرمێ پەی بە دەمۆلوایش و خەیرئامای گەرموگوڕ كەردەیش ، چوون یاراو ڕەفێقاو وەشەسیایما(پێغەمبەر) گیان ، شش مانگێش مەنێ دۆعا كەرێنێ خوایا یاونیما مانگەو ڕەمەزانی و عەمرما باقی كەری چوون زانێنێ ئی مانگێ چ گەوهەرێنە و چ كوورێوەنە پەی زاخاو دای سەرتا پاو ئینسانەكا چ لاشەو چ ڕۆح و چ عەقڵ و چ دڵشا.

ڕۆچێ یانی قەڵغان، ئینسان بە قەڵغانەكەیش تاوۆ وێش لا بدۆ جە تیرەكاو شەیتانی و نەفسی و هەواو ئارەزووی و وەشیەكاو دنیێ، پەوچی ڕۆچێ نەفس و دڵودەرونی مهێم تەرەنە جە گێرتەیۆ ئاوی و واردەی جە ڕۆچێ (مەعیدەی/گەدێ)، پەوكای مشۆم عازێوعەننامەكێ لاشەیما گرد ڕۆچێبا (دەم ، زوان،چەمێ ، گۆشێ، قاچێ، دەسێ)، مشۆم گرد ڕۆچێبا ، ئەر نا بە تەنیا (مەعیدەی/گەدێ) وێش تاق ڕۆچێ بۆو ، بێ نانو ئاوش كەری . وەلێ عازێكی تەر ئەر ڕۆچێ نەبا بەچێش مشۆ.ئاوەختە حیچ ماناو مەرامێ پەی ڕۆچێ مەمەنۆوە...

حەرپاسە دماو مانگەكێچ یاراو ڕەفێقاو وەشەسیایما(پێغەمبەر) گیانی ، شش مانگێ دماو مانگەو ڕەمەزانیچ دۆعا كەرێنێ هەكە خوا گیان چەنەت ورگێرتێێبیمێ، پی شێوە گردو ساتو وەختەكەیشا سەرەمڕە بە زیكرو یاد و بەندایەتی وخوا پەرسییۆبەسەر بەرێنێ، پەوچی مشۆم(ئشۆم) ئێمەیچ چی سات و وەخت و زەمانەنە و چی سەردەمە پەڕ جەنجاڵ و تەكنلۆجیەنە، مشۆم زیاتەر پەیوەستێ بیمێ بە دینەكەیماوە، زیاتەردەسگێرمێ بە قورئانەكەیماوە، زیاتەر گنمێ دماوڕاو ڕەویەی و سیرەوپێغەمبەری و یاراو ڕەفێقاو (پێغەمبەری) ئازیزی، چن پەیوەستێ و مولزەمێ بیمێ ( بە دین و سیرەتیۆ)، ئاننە (ئانڎە) سڵامەتێ بیمێ چی دنیێ خراپێ و فەسادێنە، مشۆم خەریكێ بیمێ بە ڕۆح و گیانیماوە، مەبۆ سات و وەختە كاما فرە بەتایبە ڕەمەزانێنە مەبۆ پێسە ئیسەی بۆ، مەبۆ پێسە بیمێ..

مەبۆ شۆنەو نەخشە وپلانەكاوشەیتانی و دژە دینەكا گنمێ..

* مەبۆ تەمەڵێ تەوەزلێ و (لاشە قورسێ) بیمێ جە جابەجا كەردەی نماو تاعەتیمانە.

* مەبۆ وەختەكەیما بەقسێ بازاڕییۆ بەسەر بەرمێ ،پاسە ئەرەجۆت كات بەسەربەردەی مشۆم ئەپێسە بۆ..تا وەختەكە تەمامیۆو ڕۆچەكێچت تەمامیۆ..

*مەبۆ كاتەكەیما كوشمێ بە وتەیۆ حەر جە پارشەوۆ بوسمێ تا نیمەڕۆ، دمای نیمەڕۆیچ ورزمێ تەپەتەپ نمێوە كرچوكاڵە كەرمێ دمایی بەیمێوە وەرانوەروتەلەفزیۆنیۆ نیشمێرە تەماشەو ئی هەڵقەكێ و ئەو هەڵقەكێ وئی بەرنامەی ئەو بەرنامەی ، ئی خەبەروباسی و ئەوخەبەروباسی وئی فلیمی و ئەو فلیمیە نازمێ حیچ چێوێما چەنە بەر بشۆ، پاسە بەر ئەجۆت ئینە ڕۆچێنمێ، با نەمانیەیمێ وهەم وەختەكەیچما بلۆ.. پێسە واچی بەزۆرپەنەشا گێرتێنمێ،چەنی نەجاتما بۆچی مانگێ..

*یام وێ مەشغوڵ كەردەی بە موبایلو تابلیتیۆ، بەتایبە گێڵای شۆنەو چێوەتەرفیهێ و وەخت كوشەكارە، چوون ئینتەرنێت و موبایل پەیوێشا بەحرێوەن حەر ئاننەش حسێبا گنیشەنە ، نەجاتبەیەش فرە ناڕەحەتا، ساتووەخت كوشتێوەن وێنەش نیا، هەم تێر مەبی جەتەماشەیو گۆشگێرتەی ،هەم وەختێ زانی بە سات ملت كوڕ كەردەن و پەشتیت و مازیت كۆمیانۆ دیارو چێواوێ هەكە پەی ئی ساتو وەختیە حیچ سودێ چانەش نیا غەیرو وەخت كوشتەی نەبۆ..

* ئینجا بەیمێوە سەرو واردەی..حەر ڕۆ بیۆ تۆ خەریكەنی ئەنواع واردە ئەنواع شیرینی و شەربەتەو ئیتر ئی مانگێ بۆبە مانگەو واردەو وتەی، مەر خوا زانۆ چ خەرجییێ بێ هودە كریۆ، ئیتر ئانە با نزیك و جەژنێ بیمێوە بزانە چ خەرجیێ و چ سات و وەختێوە كوشیۆبە بازاڕكەردەیۆ..ئیتر ئی مانگێ بۆ بە مانگەو بازاڕكەردەی و وێ مەشغوڵ كەردەی بە واردەی و وتەی و چێو سانای و تەماشە كەردەی بەرنامە مسابەقەكا و بەختەكاو پەیت بەرشیەكا و بەرنامە (خوای) ئاوردەكێ..ئینەیچە گرد بە بەرنامە كریاو چنەها دەفتەرە دولارێ خەرج كریا تاخەڵكە موسڵمانەكە چی فرسەتەنە مەجال و نماو تاعەت و عیبادەتیش نەمەنۆ تا هەمیشە خواخواش بۆ زوو جە نمێكێش نەجاتش بۆ خێرا بێوە بەرنامێ و هەڵقەكاش جە دەسەنە بەرنەشا ، جا ئانەش وەشا گردیچشا وستێنێ دماو ڕۆچەماڕای و تا دماو تەمامیای تەراویحا ، تا ئا خەڵكە سادە گەرەكشا ڕووە كەرۆ مزگی چانەیش كەرا..

*تا چی مانگێچەنە ئا موسڵمانە داماگێ پێسە بەدڵ و ئاڎیشانماو تاعەت و ڕۆچێ گێراو سەرپۆشێ تا نیمەو سەرەی بڎارەو دماو مانگەكێچ فڕەش بڎا، گەرەكشانە پێسە وەخت و ساتەكاشا سەربەراو ماگەكێ و ڕوەكا ڕایی كەرا، نماو ڕۆچێوە كرچ و كاڵەو بێ مەغزە ئەنجام بڎاو مانگەكێ تەمامناو بڕۆ بەخێر هاتی..