فریدون بهرامی
یاڕهســــووڵ شــهماڵ شنهی باڵاتـهن
حــهریر حهسرهت مهند کاڵای ئاڵاتــهن
وهنهوشــه مهستـــی بۆی ئاره قتــهن
گۆڵباخ هـــهمنامـــــــی مــۆبارهکتــهن
مانگـــی چـــوارده وێش حــهشارداوه
چــــوون بهدری سیمای تۆ درۆشیــاوه
شهونم وهش حاڵهن چوون نامێش بریان
وه ئاره قـــــی تــۆ میســــــالش دریــان
بهڕهزا ڕهقســــان شادی جه لاشـهن
شهماڵ بۆی جهناب سهوقاتی ڕاشهن
***********************************
چ خهیرهن عاڵهم مات و سهرسامهن
یانی های خوڏا چێشش مهرامهن
ئهمـرهن پــــهی عاڵــهم ئاماڏهباشهن
کاینات فهرشی ئامــــا و لواشهن
ئهمرهن کاینات مــات و بێدهنـگهن
نجووم ههراسان مانگ شهوهزهنگهن
فهرماش(جبراییل)مهحرهمی راز بۆ
بێ وچان ئێشه و باڵ وه پهرواز بۆ
(اسرافیل) سوور و بهزم و ئاههنگش
موههیا کهرو نهی هه زار رهنگش
(عزراییل) قهبزی ئهرواح نهکهرۆ
(دق الباب) وه ماڵ هیچکهس نهدهرۆ
(میکاییل) ئێشـهو ئامــاڏه باشهن
وارانی نیعمهت، شــهوی شاباشهن
مهلهک بێوچان شهوی تههلیلهن
شوکرانهی زاتـی رهبی جهلـیلهن
دهسا با وههـار قهڵـهم گێـرۆ دهس
نهقاشی کهرۆ گـوڵانی سهرمهس
ول ههنار سـووریش نمایان کــهرۆ
با چنوور ئێشهو بۆ ئهفشان کـهرۆ
پهپـــووله به نــاز قهنـــاری نه چهم
زهریــوهل وانــۆ ئارام و ئهســهم
فڕهی باڵی سۆس کاوهتـر کۆکۆ
واچۆ میـلادهن یاران مـوژده بۆ
خولاسه دهشت وسارا وکهش وکۆ
پهی ئامای حهزرهت گرد موههییا بۆ
دهسا مانگه شهو چوارده شــهو بۆ
حهیفهن پهی میلاد هیلالی نهو بۆ
رۆجیار چۆپیکێش پهی ستاران بۆ
نهوای های سهلام به هــهزاران بۆ
دهیسا ئازیزم چهمـهن فهرشی ران
نهرگیش حهسرهتمهند چهم به تهمهنان
(جبریل) بێ وچان باڵ وه پهروازهن
مهلهک پهی ئامایت ئاواته وازهن
نۆ مانگ و نۆ شهو نۆ دهقیقه شی
(اللـــه اکبـــر) واڏهشهن وهشی
بهرئاما پرشهی نووری بێ وێنهش
گهردهن چوون بلوور جام و ئایینهش
ههلههلهی شاڏی نۆشانۆشی مهی
بهعشقی حهزرهت چندوهشهن وهی وهی
وهشهن سهڏای ساز و نهی ئێشهو
وهشهن تا بهیــــان مهست مــهی ئێشهو
دهسا یا رهسوول قهڵهم ناتــهوان
وهسفی جهمالت بــکهرۆ بهیان
بها ههر مهڕیابۆ قهڵـهم وزوان
وهسفش حهواڵهی ئایاتی قورئــان
(انـک لعلی خلـق عظیـــم )
کێ ماچۆ؟ خوڏای رهحمان و رهحیم
وهرنه من غهیرهز رووی شهرمهساری
چێشم ههن وهلات باروون دیاری