شای وهفــاداران - ئوسا مهحمودی نۆسودی ( پهشێو )
سڵام و عـهلــهیک شای وهفــاداران
ئــارام بهخشی زام دڵـــهی بیــماران
شهفادهری ئێش مهڵههمی دهردم
لوولهی نهفهسی ههناسهی سهردم
میراوی سهرجوی باخچهی دڵهی ڕێش
فکــر و خیاڵــی دهروونی خهمکێش
نــووری بینایی هــهر دوو چـــهمــانم
هێـزی قامـهتی خهمیای کهمانم
تاقــهتی دڵــهی نیمــه شهوانـــم
سهرگهرمی دهروون روح و رهوانم
قهسهم بهو وهفا چهنی توم بهستهن
بهو بهسته قهسهم به دڵ پهیوهستهن
بهو خامه نه توی سهرپهنجهی دهستهن
دووریت چووون ئهفعی بهندی دڵ گهستهن
دڵ ههر پابهندهن پهرسو هـــهواڵت
بێ خهبهر نیهن جه جویای حاڵت
توی خهیمهی خاوم گوزهرگهی ڕاتهن
دڵــــم پابـــهندی دیــای وهفــاتــهن
روحم وهیلانهن چون پهروانه و شهم
وێڵی شکارهن وێنهی بینـای چهم
تــای تاقــهت بــڕیان ئارامش نیـــهن
روحم موشتاقی هامـڕازش بیــهن
لێـــڵاویـــم لێڵهن جه دووری تــۆوه
ڕوم زههری مارهن ، شهو ڕو مهبۆوه
ئینه حاڵمهن ههرسات مهرگمـــهن
سهد نێشی دووریت وه ڕووی جهرگمهن
خوراکم خهمهن ، خهفهت لام بارهن
دیـدهم لێــــــڵاوهن بــینـاییم تــارهن
تاقهتی شهوان توم نه توی وهرمهن
ئــامــاولــواتهن ئاموشوت گهرمــهن
ههرشهو به تهورێ شهو به ڕو کهروو
بــه خیاڵی شهو ڕو به ســهر بهروو
وهشهن ئاموشوت شهو توی خاوم دا
وهشتهر بێ بنیهی پات وه چاوم دا
بهڵکم بینــاییم نــوورش پــڕ نوور بـــو
بێنووریم جه دهس چهنهتا دوور بــو
رهشید زهمانهی بـــڕیهنش جهرگـــم
ئهشکاوان دهروون مهنهن تای مهرگم
مهرگ ها نه پهرواز چهم وه جهستهم دا
وه دهوری جهستهی تهمام خهستهم دا
چوون بازی بێبـــــاڵ کهفتهی زهمینم
ههرعـان گیـری دام بهستهی کهمینم