داستانهو زهریفێ 10 - عبدالله حبیبی (ئاخرش)
زهریفێ وهروو بهرهیهنه نیشتێبێره و ماتڵه بێ براکێش بهیاوه ، دوورهوه چهمش کهوت برا گۆلالهکهی و یهواش یهواش نزیک بیهوه ، مذیۆ ههر وێش تهنیهیا ، شرکهێو کهوته دڵیش ، تاقهتش نهگێرت بیاڤۆ وهرهوه ، لوا پێوهیشهوه ، ماچۆ ئهی ئهڤێ کۆنێ ؟ ماچۆ وهڵڵا چا دلێ راینه ژهنێوه بهسهزوانه ماری گهسێبێ و تله بیێبێوه و ورذ و هانه بیێبێ، ئاذێ لوهی بهراشهوه پهی دهگاگێش و منیچ ئامانێوه پهی لاو تۆ . ماچۆ دهی کێ بێ ژهنهکێ ؟ ئهژناساتا؟ ماچۆ ناوهڵڵا حهر به ههزار حاڵێ گیانش چنه مهنهبێ و تا من چا بێنێ ناماوه دهنگێ واچۆ کێنه.
تا وهنهوشێ واتش نامێش چێشهنه و ژهنۆ کێنه و یانهشا چکۆوهن ، براکێ دیهیوه ههنترینیهنه ، هیچشا نهوات ، بهڵام گرذ کهس دڵوو وێشهنه واچێ : داخۆم ئینه ئاذه بۆ؟. تاریکش کهرذه بێ و ئاذێچێ یهواش یهواش نزیکێ دهگاکێ کهوتێبێنێوه . دوورهوه شۆڵێ چراوا دیارێ بێنێ . یۆشا ماچۆ : واڵه وهنهوشێ ئانا نزیکێ بیهیمێوه ئیسه میاومێ وهرهوه ! وهنهوشێ هیچ جوابێوش نهذاوه ، یۆتهرشا چرا ونهش بهڵام حهر جوابش نهذاوه . دڤێ یهرێ جارێ تهر چڕهی ، دهنگێو نهبی . یۆشا ماچۆ دا بنیهیدێره برا . لۆسێشا نیاره . چڕهیشهوه ونه ، یۆشا روهش نزیکوو دهموو وهنهوشێش وستهوه و ماچۆ خۆ نهفهسه مهکێشۆ . رهنگهشا پڕا . ئهحمهذ ، برا گهورهکه، نهمانه دهسوو وهنهوشێ و بهرزش کهرذهوه و ماچۆ وهڵڵا مهرذێنه ، واتشا کۆره پیاوهتیت بۆ ؟ ماچۆ وهڵڵا مهرذێنه، چهمێش نیا پێوهره و دهمش بهسه و شاڵهکهش کهرشهوه و کێشتش ملوو سهرهیشهره و ماچۆ لابهردێ هۆرگێردێ مهرذێنه!. یۆشا ماچۆ دابنیشدێ برا ، ئهگهر ئینه ژهنهکۆ تاتهو زهریفێ بۆ ئێمه چێش کهرمێ؟ واچمێ تاتهیش زهریفێ ئینا لاو ئێمهوه؟ یۆتهرشا ماچۆ مهگهر زهریفێ نهوات تاتهیم ئاستا جیا؟ ئهوشا ماچۆ دهی مهگهر زهریفێ نهوات ههرچی ههن ئینا چیروو سهرهو ژهنهکێشهنه؟ ئهحمهذ ماچۆ : براکهم شهرعه مهکهردێ بنیشدێ با جهنازهکهی بیاونمێ وهرهوه ، بزانمێ چێش مهی وهرهوه ، ئاوهخته چاگه تهکبیروو وێما کهرمێ . یاوهی گۆشهو دهگهی دڤێ قاوێشا کهرذێ و خهڵکوو دهگاکێ زیای دیار و ئامهی پێوهیشاوه . ئاذێچێ داستانهکۆ مارگهستهی وهنهوشێشا گێڵناوه پهی خهڵکهکهی و واتشا به داخهوه ئیسه گیانش بهرشیهن، دڤێ جوانێ کهوتێ وهڵێشا پهی وهروو بهرهو یانهو ئهولکهریمی و یهواش یهواش خهڵکهکه فره بی و کهوتێ شۆنیشا و ئێذ پهرسێ ئهوی چێش بیهن و ئهو پهرسێ ئانه ئا جهنازه چێشا ؟ تا یاوای وهروو بهرهو یانهکهیشا و دڤێ ریش چهرمێ چڕهی ئهولکهریمی و زنیشاره و واتشا پنه . ئهولکهریمی دهسش کهرذ برا رۆ کهرذهی و جهنازهشا هۆرگێرت و بهرذشا پهی مزگی . براکێ واتشا مشیۆ ئێمه بلمێوه ، خهڵکوو دهگاکێ ناستشا بلاوه و یۆی بهرذێوه پهی یانهی و ماچۆ با بلم نان و چایێو بوهردێ و دمایی مهیمێوه پهی مزگی و ئێشهو ئینهیمێ چا و ساحبێ زوو جهنازهکهی منیهیمێ و شمهیچ ملدێوه . براکێچ بهینوو وێشانه واتشا دهی با پاسه کهرمێ ، شوورهیا ، ئێمه ئی جهنازهما ئارذهن با بنیشمێ تا بنیاش . لوهیوه پهی یانهو کابرهی . نان و چهیشا پهی ئارذێ و کابرا پهرساش کێندێ و کۆگهیێندێ؟ ئاذێچێ باسوو وێشا کهرذشا پهی کابرای و ئاذێچ ماچۆ : ئی پیا بهسهزوانه فره نیا کناچێوهیچش گمه بیهی و ئی وهڵاتما گرذ وشکنا شۆنیشهره و نهیۆزیاوه . تهنیا گجیهکهش یۆزیاوه که ئاذیچ وڵ وڵ و ونین بێ و واتشا رهنگا وهرگا وارذێبۆ و بهڵام ههرچی گێڵهیمێ قۆڵاخهکهش نهیۆسماوه. براکێ واتشا چهنی گمه بیێنه ؟ کابرای داستانهکۆ زهریفێش گێڵناوه و واتش ئهولکهریمی بهسهزوان ئیسه ئێتر هیچ کهسش نیا. خوا بهخشۆش ! ئی ژهنێشه ههرچی حهیوانش بی گرذش ورهت پنه و گاوێوهشا ئهسا تا ئاپاسه گاوهکێچ بیه سهرهوهرهش!. وێچش دووکانێوش نیانهره من فرهو وهختی ملوو وهروو بهرهو دووکانهکهیش منیشوهره ، ئا بهسهزوانه گرذ روێو کار و کاسبیش ئانهنه گرهوهی گرهڤۆ پهی کناچهکێش .
براکێ چنی کابرای هۆرسێ و لڤهیوه پهی مزگی . پیای دهگاکێ گرذ ئامهیبێنێ ئاگه و نیشتێبێنێره و جهنازهکهیچ گۆشێڤوو مزگیهکهیهنه نریابێره . ئهولکهریم پاڵوو جهنازهکهیهنه نیشتهبێره و سهرهش ڤسهبێره و جار جار پڕمینێوه دێ چنه و کۆچێو گرهوێ و دیسان لڤێوه فکرێره . براکێ لوهی لاش نیشتێره و سهرسڵامهتیشا داوه. دیسان ئهولکهریم دهسش کهرذهوه گرهوهی و جارجاریچ چێروو لچانه چنی وێش قسێ کهرێ و نامۆ زهریفێچ بهرێ . براکێ هۆرسێ لوهی دووروو جهنازهکهیهوه نیشتێره و بهینوو وێشانه دهسشا کهرذ چفه. چێش کهرمێ و چێش نهکهرمێ؟ ئاخرش تهگبیروو وێشا کهرذشا . ئهحمهذ هۆرس لوا لاو ئهولکهریمی و ماچۆ لالۆ گیان ئێمه ئهژنهویهنما فره نیا کناچێوهت گمه بیێنه ، راسا؟. ئهولکهریم دهسش کهرذ گرهوهی و کۆچێوش پنه شی و ماچۆ : وهڵڵا گرذ خهتاو وێم بیه، خۆ ئیسه ئێتر من هیچم پهی نهمهنهنهوه، با گرذ کهس بزانۆ ، وێم به دهساو وێم ئینهمه کهرذ به وێم! وێم بهرذه و ئاستهم جیا. گرذ خهتهو وهنهوشێ بیه، ئای خوا گیان چێشم کهرذ به وێم؟! یهواش یهواش خهریک بێ دهنگێش بهرزێ کهرۆوه و خهڵکهکهیچ گۆشێش شلێ کهرذێبێنێ . ئهحمهذ ماچۆ لالۆ گیان یهواش تهر ، یهواش تهر ، ههرچێو بیهن خۆ ئیسه ئاذه گمه بیێنه و ئێذه مهرذێنه ، با خهڵکی به خراب نامێش نهبهرۆ . ئهولکهریم ماچۆ دهی ئا کاره من کهرذهن حهر پهی ئانهیه خاسهنا ئیسه به زیننهی وێچم بنیانه قهبره ، کناچهکێم فره عاله بێ بهڵام ههرمان و کار و دلێ یانهی نهکهرێ و ساحبێو تا وێرهگا من لوێنێ چنی گهلهی و وهنهوشێچ مشیهیا ههرمانهکێش گرذ کهرذهیانێ ! ئاخرش مجبوور بیا گۆش دهو قسۆ وهنهوشێ و بهروو و کهشهوه بازووش جیا! ئهحمهذ ماچۆ : دهی کێ وات مهرذێنه ، نهیۆستهتاوه؟ ماچۆ ناوهڵڵا بهڵام مهجبوورێ بیهیمێ گجیێوش تلنمێ ونیهوه و نیشانۆ خهڵکیش دهیمێ و واچمێ مهرذێنه.دیسان سهرهش وسهره و دهسش کهرذهوه گرهوهی.
ئهحمهذ کۆچێو ماتش کهرذ و ماچۆ لالۆ گیان با بلم بهر ههرمانهم پنهنی ! ئهولکهریم وێشهوه شرکێوهش دریانه و بێ ئانهیه پهرسۆ ههرمانهکێت چێشهنه کهوت شۆنیش . لوهی بهر . ئهحمهذ ماچۆ لالۆ گیان قسێوه ههنه با کهرووش پهیت بهڵام هیچ دهنگ نهکهری تا بزانمێ مشیۆم چێش کهرمێ ؟ ئهولکهریم دهس و پاش کهوتهبێ لهرزهی و ماچۆ فهرماوه ، سهروو چهما. ئهحمهذ داستانۆ وێشا و کار و باریشا گێڵناشهوه پهی ئهولکهریمی و واتش یانهشا چکۆوهن و چێش کهرا چا و ئاخرش ماچۆ زهریفێ نهمهرذێنه و ئینا یانهو ئێمه ! ئا چێوێچه وهنهوشێ واتێنێ به تۆ گرذ درۆی بیێنێ و زهریفێ گرذوو ههرمانهکاش کهرذێنێ و زێڵش نامان به تۆ واچۆ ژهنهکێت ههرمانێ مهکهرۆ ، واچێ ئاخر وێم تاتهم مهجبوورم کهرذهبێ شۆنۆ ئهذایمهره ژهنی بارۆ و ئێتر نهکریێ گلهیێش چنه کهرۆ.! ئهولکهریم رهنگهش گیسیانه . نهزانێ چێش واچۆ ، نهزانێ چێش کهرۆ . ماچۆ تۆ خوا راس ماچی؟ قهسهم بوهره.! دهی ئیسه وهشهنه ؟ چێش کهرۆ ؟ . . . ئهحمهذ ماچۆ ئیسه هۆرزه با بلمێوه چوهر بهڵام تۆ کارت نهبۆ و با وێم واچوو به خهڵکهکهی. با جۆرێو نهبۆ زهریفێچ نهتاڤۆ بهیوه یام خهڵکی به خرابی نامۆ تۆ و وهنهوشێ بهرا . ئهولکهریم حهر پاسه واق مهنهبێره. ئهحمهذ نهمانه دهسشوو و بهرذشهوه چوهر و لوا وهروو دهموو خهڵکهکهی و ماچۆ خهڵکی وهشهویس گۆش گێردێ . گرذ کهس بێ دهنگ کهوت و مات مدراره. ماچۆ : حهر پاسه که مزاندێ بهینێو چیهو وهڵی کناچێڤۆ ئی پیایه به نامێ زهریفێ گمه بیێنه و نهیۆزیهینهوه. ئێذێچێ پاسشا زانان مهرذێنه و وهرگا وارذێنه . بهڵام ئی کناچێ نهمهرذێنه و ئینا یانهو ئێمه . گرذ کهس مات مدرابێره . هیچ کهس دهنگش نهی چوه .واقێ بیێبێنێ دهموو ئهحمهذیهنه، ماچۆ . ئی کناچێ سهروو کهمهرێویهوه کهوتێبێره و پاش مڕیابێ و هۆشیچش نهمهنهبێ سهروو وێشهوه ، ئێمه یۆسهوه و بهرذهماوه یانه . ئاماوه هۆش بهڵام نهزانێ کێنه و نهزانێ چکۆوه ئامهینه و نهزانێ چێشش ونه قۆمیان. پاکهش وهش بیهوه بهڵام حهر هۆشش نهیوه سهروو وێش . ئێمهیچ حهوت برهینمێ و ئاذهما نیا یاگۆ واڵێ وێما و لاو وێماوه ئاستهماوه. دڤێ یهرێ روێن یهواش یهواش هۆشش ئامانهوه سهروو وێش و ئیسهیچ خوای ئی جهنازهشه کهرذ سهبهب تا ئێمه بهیمێ پهی ئێگهی و تاتهیش بیۆزمێوه.
هیچ کهس جهنازهش ویرهنه نهمهنه بێ ، خهڵکهکه وهشیش کهوتهره و گرذ کهس واچێ خوا شۆکر. ئهولکهریم حهر پاسه واق مدرابێره . گرهوێ و ژیر بێوه و دیسان واق بێوه و مدرێرهوه. ئاخرش ئهحمهذ ماچۆ با ئیسه ئێمه چوار نهفهرێما بلمێوه پهی لاو یانهکهیما و ساحبێو زهریفێ بارمێوه. چوارشا کهوتێ را و دڤێشا چا نیشتێ. نهزانێنێ خاسشا کهرذهن یا خراب . زهریفێ دڵش پووه بیهن پاسه واچا یام نا؟
شهوێ زهریفێ و بهرزان حهر وهروو بهرهیهنه بیێ و ماتڵێ بیێ براکێشا بهیاوه بهڵام دیارشا نهبی و ئاخرش لوهی چوهر و ئیژیهیره و سهرهشا نیاوه. بهڵام هیچ کام وهرمشا نهگنێ پۆره . ئاخرش بهرزان ماچۆ با بووسمێ ئێتر باوهر مهکهروو بهیاوه. ئهجۆم راکێشا دووره بیێنه و شهوێ نیشتێنێ. یهواش یهواش خهریک بێ رۆبان هۆربهی و رۆ بۆوه چوار براکه یاوهیوه وهروو بهرهی . به دهنگه دهنگوو ئاذێشا زهریفێ و بهرزان ههیشا بیهوه و لوهی پهی وهروو بهرهی . براکێ داستانهکێشا گێڵناوه ، زهریفێ باوهر نهکهرێ . نهزانێ چێش واچۆ. ئهحمهذ ماچۆ تاتهت گۆڵوو وهنهوشێش وارذهن و وهنهوشێ درۆش دهینه چنی تاتهیت. ئا قسێ تاتهیش کهرذێبێنێ گێڵنهیشهوه پهی زهریفێ. زهریفێ دهسش کهرذ گرهوهی . بهینێوش پنه شی و ئهحمهذ ماچۆ ئێمه ئهپێسهما واتهن و تۆیچ مشیۆم بهیهوه و حهر ئینهیه واچی که ئێمه واتهن. بهڵام با ئیسه ئیسراحهتێو کهرمێ ، ئاخر هیزی شهوێ تا جهنازهکهما بهرذهوه فره مانیایمێ و دیسان هۆرگێڵهینمێوه و چهمما نهنیان پێوهره. زهریفێ ماچۆ شمه لوودێ بووسدێ من وهرمم مهگنۆوه پۆره . من چێگه منیشوهره تا ههر وهخت ههیتا بیهوه پێوهره ملمێوه.
ئهولکهریم وهشیێنه نهزانێ چێش کهرۆ بهڵام دڵوو وێشهنه واچێ خوا گیان دهی ئیسه چهنی تهماشهو چهماو زهریفێ کهروو ؟ هاگاش لاو وهنهوشێوه نهمهنه بێ ، دڵش پووه بێ هۆرزۆوه و چنی خهڵکهکهی واچۆ چێش بیهن بهڵام دیسانهوه دڵوو وێشهنه ماچۆ خۆ تازه ئهحمهذی پاسهشه گێڵناوه، با من قسهکۆ ئاذی نهخرابنوو . یهواش یهواش رۆ بیهوه و خهڵکی جهم بی و واتشا با جهنازهکهی بهرمێ پهی سهروو زیارهتی، ئهولکهریم ماچۆ نا با زهریفێ بهیوه ئیجا بنیهیمێش. خهڵکهکه فرهتهر جه ئهولکهریمی دڵشا پووه بێ زووتهر زهریفێ بهیوه بهڵام دڤه براکه که چا مهنێبێنێ واتشا یانهما دوورا و تا نیمهرۆ مهیاوا وهرهوه . ئاخرش ئهولکهریمیچ رازی بی پانهیه جهنازهکهی بهرا و بنیا. خهڵکهکه جمهیره و جهنازهشا هۆرگێرت و کهوتێ را پهی سهروو زیارهتی.
رۆ بیهبێوه و زهریفێ ههر پاسه وهروو بهرهو یانهکهیهنه نیشتێبێره و گرهوهی گرهوێ ، بهرزانیچ جار جار ئهی بهر و سهرش دێ ونه و لوێوه چوهر . شاهۆ پێسهو جارا دوورهوه دهسێوش تهکنا پهی زهریفێ ! زهریفێ رهنگهش پڕا ، ئهی خوا دهی ئیسه چێش کهروو ؟ خۆ شاهۆ مهزانۆ چێش قۆمیان و مهزانۆ ئێذێ ئینهی چیه. زوو چرا بهرزان دا بۆ بهر بزانه ئانه کێن ئاما پاگهوره؟! بهرزان ئاما بهر و ماچۆ شاهۆن بهڵام پهی ساحبه پهی چێشی ئامان پهی ئێگهی؟ شاهۆ تا دوورهوه چهمش کهوت بهرزانی زاناش زهریفێ وێش تهنیای نیهنه. ئاما وهرهوه و سڵامش کهرذ و نیشتهره . پهرسا بهرزانی چی نهلان ههرمانه؟ بهرزان جهرهیانهکهو زهریفێش پهی گێڵناوه و به دهنگه دهنگوو ئاذیشا ئهوێچێ ههیشا بیهوه و ئامهی بهر و وهشی تشیشا کهرذ چنی شاهۆی و واتشا دێرا با بلم . شاهۆیچ ماچۆ منیچ مهو!. واتشا دهی تۆ پهی چێشی مهی ؟ خۆ تۆ کهسی مهژناسی؟ ماچۆ حهر پاسه دڵم پووهن بهو !. گرذ کهوتێ را . زهریفێ دلێ راینه ههر قسێ کهرێ چنی وێش . شاهۆ ویرێنه بێ و نهزانێ قهرارا چێش بهی وهرهوه.
ئهولکهریم و خهڵکوو دهگاکێ جهنازهکهشا نیا و گێڵهیوه پهی دهگای . نیمهرۆ بێ و خهڵکهکه چنی ئهولکهریمی لوهیوه پهی یانهی ، ئهولکهریم ههر وهروو بهرهو یانهکهیشانه ماتڵوو ئامای زهریفێ بێ ، دهنگه دهنگێو پهیذا بی ، خهڵکهکه گرذ زیاره ، واتشا ئانا ئامهیوه!. ئهولکهریم بێ پاڵا دهسش کهرذ رهمای و لوا پێوای زهریفێوه. زهریفێ تا چهمش کهوت تاتهیش مدراره ، نهتاڤێ بلۆ رانه ، هێزش چنه نهمهنهبێ ، به ههرچی جۆرێو بی ئهولکهریم وێش یاوناش لاو زهریفێ. دهسشا کهرذ ملوو یهکترینی، ههرڤێ گرهوێنێ و خهڵکهکهیچ چنی ئاذیشا گرهڤێ. هیچ کهس هاگاش لاو مهرگوو وهنهوشێوه نهمهنهبێ. هۆرگێڵهیوه و خهڵکهکه کهوت شۆنیشا تا بهرهو یانهی. بهرذێشاوه یانه. شاهۆ و حهوت براکهیچ چنیشا لوهی چوهر . خهڵکهکه نهزانێنێ مشیۆم وهشی کهرا یام خهفهت بووهرا . ئا روه تا وێرهگا شاهۆ و حهوت براکه چاگه نیشتێ . وێرهگا سهرسڵامهتی ئهولکهریمی و زهریفێشا داوه و کهوتێوه را پهی دهگاکۆ وێشا. ئهحمهذ ماچۆ لالۆ ئهولکهریم گیان ئانا زهریفێما ئهسپارهی پنه ، هاگات چنه بۆ! دمایی دیسان مهیمێوه پهی لایتا.
شهوه ئاماره و زهریفێ ئهجێ ئینا یاگێوه غهریبهنه، بێ تاقهتۆ تفاق و میزانهکهو یانهکهو براکا بێ! . دڤێ یهرێ روێش پنه شی تا یهواش یهواش خهڵک لواوه یانهو وێش و مهنێوه وێشا تهنیای. چنی تاتهیش دهسشا کهرذ دهرذی دڵ . هرچی بێ و نهبێ گرذشا گێڵناوه پهی یهکترینی. باسهکهو شاهۆیچش کهرذ پهی تاتهیش!.
شاهۆ شۆنۆ ئانهیهره لواوه پهی دهگاکۆ وێشا ، باسوو زهریفێش کهرذ پهی تاتهیش و واتش تاته گیان من دڵ ئینا پا کناچێوه و حهز کهروو شمهیچ ویندێش و ئهگهر دڵتا پووه بۆ داواش کهردێ پهیم . شۆنۆ حهفتێویهره شاهۆ و تاتهش و برێو جه نهوکهرهکاشا کهوتێ را پهی دهگاکۆ زهریفێ. لوهی یانهشا و سهرسڵامهتی ئهولکهریمیشا داوه و چهمشا کهوت به زهریفێ و دمایی وهختێو گێڵهیوه تاتهکهو شاهۆی ماچۆ رۆڵه گیان ئێمهیچ چهمما کهوت به کناچهکێ و پهسیناما ، ئهگهر وێچت دڵ پووهن با ماوهیوتهر بهیمێ داواش. مهرگوو وهنهوشێ یهرێ مانگێش پنه شیهبێ و چی ماوانه شاهۆ جار جار ئهی پهی لاو زهریفێ و بهروو دهگاکێوه چهمشا گنێ یهکترینی و دڤێ جارێچ زهریفێ چنی تاتهیش لوهی پهی لاو حهوت براکهی . ئاخرش روێوشا شاهۆ ماچۆ زهریفێ گیان چنی تاتهیت واچه سهبهی تاتهم مهی داوات. ئامهی داواش و دریا و شۆنۆ ماوایویهره مارهشا بڕیهو دمایی زهماوننهشا کهرذه و شاهۆ و زهریفێ بیێ ژهن و شوو و تا ساڵهای ساڵ به وهشی ژیوای . . .
ئینه بێ داستانۆ زهریفێ . ئۆمیدوارهنا به دڵتا بیێبۆ . چانهیه که شۆنۆ ئی داستانێتا گێرته و گرذ جارێو به راوینه زهریفهکاتا هانیتا دانێ تا بتاڤوو تهمامنووش سپاستا کهروو . ههر مهندێ به وهشی و بنیشدێ به شاذی.