مزگانی: کتێبو نامه نویستهی به زوانی هۆرامی ئاما بازار
وانهره ئازیزهکا هاگادار مهکهرمێوه پی زووانه کتێبو "نامه نویستهی به زوانی هۆرامی" مهینه بازار. ئی کتێبه دووهمین بهرویرو نویسهری هۆرامی، هوردهست محهمهدی مستهفازاده ین که کتێبخانهو هۆرامانی رهنگین و دهوڵهمهند مهکهرووه. جیا جه نوسیهی، چاپکهردهو ئی کتێبهیه زهحمهت، تهلاش و مهینهتی فرهش شونێوه بیهن. وهشبهختانه گردو ئا وهربهسانه به لێرهوی پوڵایین لاشیێ و پهی زوان و فهرههنگو هۆرامانی لاقورێوه گهورێ هۆرگیریا. ئی کتێبه ههر پێسهو کتێبه وهڵینهکهو ئادێ "زوانی هۆرامی و دنیای مودێرن" جه نهوعهو وێشهنه هورکهت یا حادسهیوه گهورهن جه رهوتو ئهوهژیوای کێبیهیی یا هووییهتو فهرههنگی هۆرامانی که جه ئایهندهنه ئێژایی و ئهرزشو ئی ههرمانێ وێش نیشانه مدهونه. چیگهنه به شێویه خولاسه برێو تایبهتمهندیێ ئی بهرویرهیه مهوزمێ وهرو چهمی:
* 1 – ئی کتێبه داراو شهخسییهتیوی سهربهوێ و وێپای هۆرامین. به داخهوه جه تاریخو ئاروینو هۆرامانی تا ئیسه پاسه باو بیهن و به غهڵهت کهوتهن یاگێ که نویسهره هۆرامیهکا یا ئهسڵان به زوانی هۆرامی نهنوسیهنشا و یا ئهگهر چێوێوشا به هۆرامی نوسیهن فرهیێ جه چوارچوهکهیش یانی: تهشک، عونوان، فهرێست، دلێگیر، وهڵینه، دلێنه و ئهوتهر چێوهکاش به غهیری هۆرامی بیهن. بهڵام ئی کتێبه ههر پێسهو ئهوتهر کتێبهکهو نویسهری به تهمام و کهماڵ کتێبێوی هۆرامیانهنه: عونوانش، دلێگێرش، وهڵینهش و دلێنهش و جه گردی موهمتهر روحش!
* 2 – ئهدهبیاتی هۆرامی ههر چننه جه شێعرێنه دهولهمهندهن بهڵام جه ویهرو نهسر یا تکستینه هاڵیگاش فرهن. ئی کتێبه که 183 پهل یا سهفحێن گردش نهسرێوی ئارویانه، رهوان، دڵگیر و معیاری هۆرامیانهن.
* 3 – نویسهرو ئی کتێبهیه سهعیهش کهردێنه بیاوو به زوانێوی معیاری هۆرامی. یانی وێش نهبینانوه به لههجهو مهحاڵێوی خاسو هۆرامانی و نهسرهکێش تێکهڵێوهنه جه گردو لههجهکاو زوانی هۆرامی. ئیکاره گهوره بنهرهتێوی باشهن پهی زوانی معیاری هۆرامی جه ویهرو نوسیهو نهسر یا تکستینه. ههرپاسه که گردما دهسما پهنه کهردهن و به دهلیلو ئانهیه زوانی هۆرامی چننه لههجێش ههنێ پانهیه یاواینمێ مهشیوم زوانی معیاری هۆرامی وهش بکهرمێ.
* 4 - ئی کتێبه به پهیلوایێوی رهوانشناسانه نوسیان. ئانه واقعیهتهن که وانهر و واچهری هۆرامی زوان تا ئیسه نه کتێبێوی هۆرامیانهش وهردهسهنه بیهن و نه چهمێش عادهتشا کهردهن به هۆرامی وهنهی. نویسهر به باشی تاوانش قابلیهتو زوانی هۆرامی نیشانه بدهو و به ئاردهی نهسرێوی رهوان و دڵکهش گهرهکش بیهن بتاونه وانهری هۆرامی زوانی هوربنیهو تا عادهت بکهرو به هۆرامی وهنهی و به هۆرامی نوسیهی. جه واقعێعهنه متاومێ بواچمێ ئی کتێبه جیا جه گردو ئا ئهرزێشانه که یهک کتێب پهی وێش ههنێش ویهرێوهن پهی ئاموزش، فێربیهی و فێرکهردهو زوانی هۆرامی.
* 5 – گاههس کهسانێو پهرسانێ و بواچانێ جه قهرنهو بیس و یهکینه نامه نوسیهی چه زهرورهتێوش ههن؟ نویسهرو وێش ئینهیه خاس مزانو و ئاگان چا مهسهلێ بهڵام جه داواچهنه یو متاو پاسه جواب بدهووه که دروسهن نامه نویستهی به شێوهی سونهتی و قهدیمی باوش نهمهنه وهلێکانی ئارو ئیکاره فره وهرپانتهر و به شێوهیه فهراوانتهر زهرورهتش ههن و نامه نوسیهی بیهن به ههرمانهو روانهو گرد کهسێوی. ئیمهیڵ یا پوستی ئێلکترونیک، پهلیانه نوسیهی، اس م اس یا پهیامی کوڵ، تهبریک واتهی، سهرهوهشی، خولک کهردهی و فره چێوههایهرهتینێ که ئارو تهێکهڵو ژیوای ههر ئینسانیویهنێ. نویسهر به باشی و ئاگاهانه گردو ئی چێواشه ئاردێنێنه دلێ ئی کتێبهیه. ئهگهر یاوگه گهشهدای و پارێزنای و وهروستهی زوانی هۆرامین ئیمهیل، پهیامی کوڵ و پهلیانه نوسیهی دهسپهنهکهریوی فره باشهن. چی راینه ئی کتێبه یاردیدهرێوی فره گهورهن.
* 6 – بهراسی پهی چاپو ئی کتێبهیه زهحمهتی فره کێشیان. ئهمن پێسهو شاهێدێوی که جه نزیکوه هاگادارو ئی ههرمانێ بیهن پهی تاریخی و هاگاداری وانهره وهشهویشهکا و ههر ئینسانیوی بهشهرهفی مهشیو بواچو به داخهو جه ئوستانهو کوردستان و کرماشانیو ئێرانیهنه ناسیونالیسته کوردهکا که جه ئێدارهو ئێرشادینه وهرپهرسو ئی کارهیه بێنێ ناستشا ئی کتێبه موجهوز یا ئیجازهو چاپی بگیرو و پهی فرهتهر جه یهک ساڵا وهرو ئی کاریشانه گێرت و واچێنێ مهشیو کهلێمی زوانو هۆرامی لابشو و بنویسیهو لهههجه یا گویشی هۆرامی!!! ههر پاسه نهزهرهشا ئانه بێ مهشیو وهڵینهکهش سانسور بکهریو. (ئاخر ئینسان نمهزوانو چێش بواچو زوانێو که به شایهتهی تاریخی و به سهندی پهسهند کریا سابێقيش میاووه پهی چن ههزار ساڵا و به نهزهرهو زوانشناسا بنچینهو زوانی فارسی و ئهوتهر زوانه کوردیهکان چهنی مهشیو بواچیوش پهنه لههجه یا گویش؟ تهفهکورو ناسیونالیسمی کوردی ئهگهر هیچ دهسکهتێوهش نهبیهبو ئهچی ویهرهنه که ویری وهرتهسکو زوانی یهکگرتوی کوردیش _ لههجهیوه که سابێقهش جه 200 ساڵا زیاتهر نیهن_ کهردهن به چراوهو و عاساو دهسوو وێش فره سهرکهوته بیهن !!!) بهڵام به ههر سورهت بێ جه چڵهپوپهو نائومیدینه ئومید پێوا بی و به تهلاشو برێو ئیناسنێ فهرههنگ دوسێ و حهق تهڵهبێ جه تارانهنه ئی ههرمانه گهورێ به ئهنجام یاوا و ئیجازهش پهی گێریا و بێ یهک کهلیمه فارای، ئی کتێبه سپاریا به دهسو چاپی.
* 7 – ئهمن مهتڵهبێوی موفهسهڵم سهرو ئی کتێبهیه و ئهوتهر کتێبهکهو نویسهری، جهبارهو نهقشو ئی کتێبانه جه رهوتو ئهوهژیوای زوان ، فهرههنگ و کێبیهیی یا هووییهتی سهربهوێ هۆرامانی، نوسیهن. قهرار پاسه بێ به عونوانو وهڵێنهو کتێبهکهی چاپ بو که به دهلایێلێو ئا کاره سهرش نهگێرت بهڵام ئایهندهیوی نزیکهنه ئا مهتڵهبهیه وڵاو مهکهرووه.
شناسنامهو کتێبهکهی:
نامه نویستهی به زوانی هۆرامی نویسهر: محهمهد مستهفازاده
تاران. وڵاوکهرهوهو: بلخ ی قیمهت: 3500تمهنێ
11 ئازهرو 1390 ڕوجیاری، 3 دسامبرو 2011 میلادی داریوش رهحمانی. مهریوان