رازێ وهشێ (چۆتاش) -شعیب خالدی زاد
پیرە چۆتاشێوە وێش ئامادەو ئەرە کەوتەی کەرێ .
رێوە لوا لاو ساحیو هەرمانەکەیشو جەرەیانش گێڵناوە
واتش ئەوەجەم بە سیەی هەن ، ئیتر دماو ئی گر ڕۆ هەرمان کەردەییەو شەکەت بیەیە ،
مەشیۆ ساتێوەیچ مانیاییم بەرشۆ ؟
گەرەکمەن بازو جیاو بنیشورە پەی وێم .
ساحیو هەرمانەکەش فرە قینەش ئەومەو حەولش دا پەشیمانشۆوە کەرۆ ،
وەلێم کابرەی چۆتاش هەر سەرو قسێ وێشەرە مندرابێ و تەکانە نوەرێ .
سەرەنجام ساحیو هەرمان ، هەر چەن حەز نەکەرێ پی داوایشە ،
ئەرینەش دا بە قسەکەیشو واتش پەی دماتەرین هەرمانێ وەش کەردەو یانێوە گێرۆ گردەن .
چۆتاش دڵش نەوێ پۆوە ئی هەرمانێ کەرۆ ، وەلێم روگیر بیو واتش باش .
چونکە قەبوڵ کەردەی ، وەش کەردەو ئی یانەیە نەوەدڵانە بیەبێ ،
زو لوا کەلوپەلێوە خراوو یانە وەش کەردەیش گیر ئەوردو بە پەلە و نارێک
خەریکو یانە وەش کەردەی بی .
وە پەی ئینەیە زو بیاوۆ بە ئەوەسیەی ، هەرمانەکێش یاونا پەڕو تەمامش کەرد .
ساحیو هەرمانش جە تەمام بیەو یانەکەی خەوەردار کەرد و
ئادیچ پەی گێرتەو کرێڵو دماتەرین یانەو ئۆسای پیری ، ئەومە پەی لەیش .
ساتێوە کە ساحیو هەرمانەکە کرێڵەکەش جە چۆتاشەکەی گێرت ،
نیاشۆوە مشتەو چۆتاشەکەیو واتش :
ئی یانە خەڵاتێوەن جە لانو ئەمنۆوە ، بۆنەو ساڵهای ساڵ هامکاری چەنی ئەمن .
چۆتاش تەکانەیش واردەو ئەومۆوە وێشەرە ، زاناش چ پەننەیش دەینۆوە؟!