داستانهو عهلی - عبدۆڵڵا حهبیبی
* * *
ساڵۆ حهفتهی ، تا ڤا یاگێ ویرم بۆ یهرێ چوار بزێ و بڕێو کاوڕێ و گاوێوهما بێنێ . روێوشا ئهﮆام ماچۆ رۆڵه گیان دا بزاندێ یاگێوهنه مشووروو کوچێو نانهڕهقێ مهوهردێ با کهرمێ تێکهڵوو ئاڵفی و دهیمێ پی گاو و گۆجهرهیه . منیچ کهوتانێ کهرﮆ و کۆشوو ئانهیه نانهڕهقێ بسانوو پهیشا . روێو یاگێوه بهحس بێ واتشا پاسگا نانهڕهقێش ههنه و ورهشۆش . منیچ لوانێ پهی پاسگای . ئاوهخته کهلاس یانزه بێنێ ، رهیس پاسگا پیایوی پیر بێ به نامۆ ئاغهی ئهحمهدی ، لوانێ و واتم ئامانا نانهڕهقهکێتا بسانوو . ماچۆ دهی قهﮆش چێشا. مهزانوو ئاوهخته کیلوێو چن بێ بهڵام دوێ گۆنیێم ئهسا و ماچۆ ئیسهولا گرﮆ مانگێوه متاوی بهی گۆنیێو بسانی .
مانگێ دمهینه که لوانێ کۆڕله گۆلالێوی نۆ ساڵه چابێ پهرسام واتم ئینه کێن واتشا کۆڕوو ئاغهی ئهحمهدیا !! پنهش نهوهرێ ئاﮆ پا پیریه ئینه کۆڕش بۆ. نامێش عهلی بێ. بڕێو قسێم کهرﮆ چنی و وهختێو گهرهکم بێ بهوڤه ، عهلی ههروێ پهیش کهرﮆێشهنه پاڵهیڤ و ماچۆ من گهرهکما بلوو تهماشهو گاوێ ! کۆره ئهﮆات خاس تاتهت خاس ! ماچۆ نا ئیللا نه بیللا مشیۆم بهریم تهماشهو گاوێ . واتم دی خاسا بۆ بلم . بهرﮆم و تا نیمهرۆچ چاگه نیشت . دوێ یهرێ روێ تهر که نۆتشهنه نیشت وێش فێر بیهبێ و گرﮆ روێو ئهی تهماشهو گاوێ ! . شۆنۆ یهرێ رواره لواوه پهی کرماشانی و ئێتر نهﮆیم. تاتهیچش ههر ئا ساڵه نۆتشهنه لوا و کهوتهوه کرماشان.
دوێ ساڵێ شۆنیشهره منیچ پهی درێژهدای به وانای لوانێ کرماشان. راسهکێش من ئێتر عهلیم ویر شیهبێوه ، ساڵۆ دۆوهمۆ دانشگای بێ ، من ئامابێنێوه پهی نۆتشهی شهوێوه رهفێقێوم جه پاوهنه تهلهفوونش پهی کهرﮆا و ماچۆ ئارۆ وێرهگا کرماشانهوه ئهی ئهینێوه ، مینبووسهنه زارۆڵه گۆلالێو پاڵمهنه نیشتهبێره. وێشهوه پهرسام واتم ئهرێ پی وێرهگا دێر وهختهوه کۆگه ملی ؟ ماچۆ مذیهو ههورامیش حاڵی مهبۆ ئێتر به فارسی پهرسام کۆگه ملی وێت تهنیهی پی دێرهوه ؟ ماچۆ واتش ملهی ملوو پهی نۆتشهی ! واتهبێش رۆڵه گیان ئیسه ماشینت مهگنۆ مشته بلی پهی نۆتشهی و بهرﮆهبێش وا یاگێ که ماشینێ نۆتشهی مدرێنێ و واتهبێش ئا ، دهی نهواتم ماشین نیا بلی . ماچۆ واتم کهسێوتا ههن جه نۆتشهنه ؟ واتهبێش ئهرێ، مامۆم ! پهرسابێش دهی مامۆت کێن؟ شماره تهلهفوونشا مزانی ؟ ماچۆ مذیهو نامۆ تۆ و شماره تهلهفوونوو تۆش واتا پنه !!! . واتهبێش دهی فره خاسا چوون من ئاﮆی مژناسوو بۆ ئیسه بلمێوه پهی یانهو وێما ساحبێ زوو وێم مارووت ئێگه و سواروو ماشینیت کهروو بلی پهی نۆتشهی . ماچۆ ئیسه ئانا چێگه ها قسێش کهره چنی . وهختێو واتم ئهلهو مذیهو ماچۆ مامۆ ! واتم تۆ کێنی؟ ماچۆ عهلیهنا !!! ...
ساحبێوش ئاما پهی نۆتشهی. واتم خهیر بیهن وێت تهنیای؟ ماچۆ وهڵڵا تاتهم قهرارا بهیوه پهی نۆتشهی واتش وهڵێنه تۆ لوه چاگه لوه مهدرهسه تا ئێمهیچ بهیمێ !!!! واتم عهلی پیاوهتیت بۆ دیارا درۆی مذهی . ماچۆ ناوهڵڵا !. کتێب و چێوش ئارﮆهبێ چنی وێش . فره نهلمێ تانشهره تا یهرێ روێ ههر سهروو قسۆ وێشهوه بێ ، منیچ نه شماره تهلهفوونوو یانهیشا زانێنێ و نه حیچێو. ئاخرش ئاما پنه که یانهنه گژیان چنی ئهﮆهیش و بهرشیهن و ئامان پهی نۆتشهی ! واتم شمارهکهتا دهم پنه با تهلهفوون کهروو پهی یانهیتا ئیسه خهفهتشانا . شمارهش دا ، وهختێو زهنگهم دا مهحهل بێ وهشیێنه مرا . ئهﮆاش ماچۆ گرﮆوو کرماشانیما وشکنان شۆنیشهره ، ئێتر تهماما بڕیهبێ ئینه یهرێ روێن یانهما شیوهنا . واتم خهفهتتا نهبۆ وێم مارووشهوه . شۆنۆ حهفتێویهره به ههزار زۆرێ بهرﮆمهوه . خۆ من یانهشا نهزانێنێ وێش بهرﮆا تا بهرهو یانهیشا ، بهرﮆمهوه یانهو تا شهوێ چا نیشتا بڕێو چێوێم ئامهی دهس . تاتهش وهڵێنه ژهنێوهش ئارﮆێنه و چاﮆێ کناچێوهش بێنه کناچێوه که دوێ ساڵێ جه عهلی گهورهتهره بێ ، ئا ژهنێشه مهرﮆێنه و یوهتهرهش ئارﮆێنه و ئیسه چاﮆێ یهرێ زاوڵێش بێنێ عهلی و دوێ گۆلالێ تهر.
تا ساڵۆ حهفتاوچواری ههر جارجار لوێنێ سهر دێنێ عهلی . ئێتر نهلانێ و تا دهرسم تهمامیا و ئامانێوه .
رۆ دوانزهو ئهوهڵ مانگۆ وههاروو ههشتا و ههشتی(شۆنۆ چوارﮆه ساڵاره) یۆ جه رهفێقام چنی ژهن و زاوڵهیش ئامهیبێنێ پهی یانهیما . زاوڵهکێش یانهنه بێنێ و وێما لوهیبێنمێ پهی بهری . وێرهگا دێرێو یانهوه تهلهفوونشا پهی کهرﮆا و ماچۆ پیهیو ئامان فارسی قسێ کهرۆ و کارش پنهنی . واتم کێن ؟ واتشا مهزانمێ بهڵام وێش ماچۆ نامێم عهلیهنا و کرماشانیهنا و تهنیا گهرهکما چهمم پنه گنۆ و بلوهوه . واتم دهی واچه بنیشۆ تا بهوهوه . ماچۆ وهڵڵا مهنیشۆ واتش ملوهره جاﮆه چا منیشوو تا بهی ( یانهما کۆچێو دوورا جه جاﮆهی ) . ئامانێوه مذیهو دوێ پیهی چا ماتڵێنێ و ماشینێڤوو ئیران خۆدرهویچ مدران. ههر نزیک بیاوه یۆشا ئاما وهرهوه و سڵام و وهشی و تشی . واتم مهژناسووت ؟ ماچۆ عهلیهنا و . . . . واتم یاخوا خێر بهی ، تاتهت چێش کهرۆ وهشا ؟ ماچۆ وهڵڵا چوار پهنج ساڵێ ههن فهوتش کهرﮆهن . فره سهختم ئاما ونه . واتم بهخشه نهزانانم ، دهی فهرماوه بلم پهی یانهی . ماچۆ ناوهڵڵا مشیۆم حهتمهن بلوهوه . واتم ههرگیز مهکریۆ چهنی مازوو ؟ ماچۆ ئێشهو قهرارا واڵهکێم دهیمێ شوو و وێت مزانی ئیسه من گهورهو یانهیهنا و مشیۆم حهتمهن چا بوو. واتم دهی ئیسه چێش کهری ؟ کار و بارت چێشا ؟ ماچۆ تا کهلاسوو نۆی دهرسم وانا و دهسم ئاست بهڵام شۆنۆ دوێ ساڵاره دیسان دهسم پنه کهرﮆهوه . لوانێ تاران لیسانسم گێرت و ئیسهیچه ئیران خۆدرهوهنه کار کهروو . سهبهیچ مشیۆم بلوهوه پهی تارانی. ئاخرهوه وهختێو گهرهکش بێ بلۆ ، ماچۆ راسی ویرتا تاتهم چێگه رهفێقێوش بێ به نامۆ فڵانهکهسیچ ؟ واتم ئهرێ . ماچۆ داخۆم نهکریۆ چهمێوم گنۆ پاﮆیچی . بهرﮆم چهمش کهوت پاﮆیچی و ههرچیما کهرﮆ نهنیشت و لواوه .
یهرێ مانگێ شۆنیشهره لوابێنێ پهی روانسهری ، دووکانوو یۆ جه رهفێقهکامهنه بێنێ ، یۆ ئاما چوهر و چا نیشتهره . ئێمه ههرپاسه خهریکوو قسا بێنمێ واتم دهی ئێتر دێرا و با من بلوهوه. ماچۆ بنیشهره برا دێروو چێشی ؟ واتم تا بلوهوه نۆتشه شهوهنه. مذیهو کابرا که تازه ئامابێ چوهر هۆر کرووکیا و ماچۆ تۆ نۆتشهیهنی ؟ واتم ئهرێ ، پهی چێشی پهرسی ؟ ماچۆ ئهگهر ویرت بۆ ئهوسا نۆتشهنه رهیس پاسگهو بێ به نامۆ ئهحمهدی . واتم ئهرێ ویرما و مژناسووش . ماچۆ منیچ ئاوهخته چا بێنێ و ئێتر وهروو ئانهیه ههر بهینما وهش بیهن ئیسهیچه ئینانێ روانسهر. ئیجا مزانی چی پهرسام واتم نۆتشیهنی ؟ واتم ناوهڵڵا چی ؟ ماچۆ کۆرهکهو ئاغهی ئهحمهدی شۆنۆ چنێ ساڵاره ئی عهیده ئامان پهی نۆتشهی واتهنش گهرهکما بلوو سهر دهو یۆ جه رهفێقهکهو تاتهیم . ئیسه ئهﮆاش فره دڵش پووهن بزانۆ پهی لا کێ لوان . واتم پهی لا من ئامابێ . گوا وهروو چێشی ئهﮆاش گهرهکشا بزانۆ؟ ماچۆ گوا نهزانانت ؟ شرکهو دڵیم ئاما ، واتم ناوهڵڵا گوا چێش بیهن ؟ ماچۆ ساحبوو ئا رۆیه وهختێو گهرهکش بیهن بلۆوه پهی تارانی ، ههمهﮆان تهسادفش کهرﮆهن و کۆشیان. ههر فره نارهحهت بیا. تا ماوهیو نهتاوام قسێ کهروو . شۆنیهره ماچۆ دهی بهش پیاوهتی کهری سهرێو دهی ئهﮆهیش . واتم دهی نام و نیشانوو یانهکهیشا دهم پنه . نام و نیشان و شماره تهلهفوونهکهشا دانێش بهڵام ههرچیم کهرﮆ نهتاوام بلوو وینووش ، واتم با داخۆ دڵیش تازێ نهبۆوه .