داستانه‌ی کۆڵه‌  -  داستانۆ رەفێقێ  خرابێ  و عالێ


وێش وستەبێ وەرمەرە ،فکر وخەیاڵەنە بێ چەنی وێش جە رەفێقەکاش دزوۆە. تەڵێوی پیسشا پەی نیابێوە. گەرەکش نەبێ ئاذێ بزانا ئێذ جە کەین و بەینەکەیشا هاگادارا. نەزانێ چێش کەرو، موبایلەکەش زڕیاوە. یاخوا خەیر بۆ، ئیسە پەڵپێوە میزووەو  ویم رزگار کەروو. ئەی رەحمەت قەبرو  ئاکەسیە موبایلش وەش کەردەن .موبایلەکەش هۆرگێرت،دماو سڵام وەشی تشی، ناستش ئەو  دەم کەرۆوە، واتش: راسیتا،وەڵڵا فرە ناراحەت بیانی . دەی چی پاسە بیەن هەرئیسە ویم  میاونوو  لاتا، بەشکووم بتاومێ، ڕاچارێوش پەی بێزمێوە،خاسا شمەچی زووتەر نەواتەنتا، جارێو خوا حافیز، چارەکێوتەر وێم یاونوو  واگە.

وێش گورج کەردەو ،بە رەفێقەکاش واتش: بەخشدێم هەرمانێوەم پەی ئامێنە  وەرەو، مەجبوورەنا  بلوو .حەز نەکەرێنی بازووتا جیا ،با وەختێوتەر  پێوەرە منێشمێرە، ئەپی جورە ئا زەنگە بی بە خەیرە  پەیش و چا دامێ پەێشا تەنابێ ،خەلاسش بی.

فاروق وڕ وکاس بیەبێ،سەرەش لوا بێ دەرێوی وێرانەرە .نەزانێ کوسالان چی ئی قسێشە  کەردێ.هیچوەختێو پێسینە  نەبیەبێ .خوا خەیرش کێشو ،نەجوڕیابو خاسا .با زەنگێوتەرش پەی  دەوو، بزانوو دەنگو باس چێشا.

دیسان زەنگش دا .فاروق ئی جارە  واتش : ئەی یا خوا دەست وەش بۆ ،ئا زەنگەیتە نەجات دانی.

چێش ماچی ؟ منت شێت کەردانی. وەش قسێ کەرە بزانوو چێش بیەن.

فاروقی واتش : خوانە با چارەکێو تەر مەوو پەی لایت گردچێوت  پەی ماچو و،خوا حافێز  ئینانا  ماشینەنە، با جەریمەم  نەکەرا.

چن کوجیەنە  ویرەد تا یاوا  لاو یانەو  فاروقی، زەنگو بەریش دا . فارو‌ق زیارە .سوارێ ماشینی  بیێ، کەوتێ ڕا .جە شاری زیێوە. ماشینەکەش قەراخو  جاذەیەنە مدرنا. وەستێرەو روەو بەرزایی  کەشەکەی کەوتێ ڕا. کەش و کۆ چەرمە بێ .وەروە وەڵاتش گێرتەبێرە. هەواش سەرذ نەبێ .دلێ  وەروێرە کوچێو لوێ ڕارە.

فاروقی واتش: ئادەی کوساڵان ، دەرە، بزانوو جەرەیانو ئی قسە وێڵاتە چێشا؟

فاروقی دەسش  پەنە کەردو واتش: زەمانێوی خرابا نمەزانی  بە كێ  باوڕ  ەری .نمەتاوی دوس و دوژمەنی جە یەکتری جیا کەریەو .تاواخیاتە  روزگاری کارێوش کەردەن  بە چەماو ویچت متمانێت  نمەنێنە.

ئارو وێم تاق مەریوانەو ئامانیەو پەی پاوەی. جاذەو تەتەی وەروێ  بینان، پی  زوویەنە  وەرنمەبو . هەورامانەرە ئامانی .هەرچن دیمەن هەورامانو ،بڵبەرو سلینەو  هانەو بڵی و... پەیما وەش و مەکینا و هیچوەختیو ەنەش سێرێ نمەبیمێ ،ئی جار پەی ئەو جاری هەر وەشتەر مرمانو. بەلام وێت تاق  دەی ئاجاذەیە،پا گردە چاڵ و دەسەننازاوە ،ئیتر ویت خاس زانی چن مانیەی . سەرەت نەئێشنو یاوانی نوریاو،فەرزادی زەنگشدا.واتش:چکونی؟بورێ پەی یانەو وێما،چەنی رەفێقاما نیشتێنمێرە ،تفاقما حازرا.

فرە حەزم کەرد، واتم: خاسا ئیسە مەو پەی لایتا. لوانی پەی لایشا دماو نان و چای واردەی ،واتم : مانیانا  با وەنەوزێوە کەروو .چەمێم گەرمێ بێێبێنێ ، وەرمم نەکەوتەبێ  پورە .ئەجیاشا وتەنا . سڵێمانی وات :فەرزاد با ئاذیچی  کەرمێ. موعتادش  کەرمێ. وێت  زانی ئەگەر موعتاد بۆ،نانما  گنو دلێ ڕوەنی.پێسە نەکەرمێ وەزعەما شڕەنە. فرزادیچ  واتش: فکرەکەت قسێش نیەنە. دەموو  دەزگاکەی حازر کەردێ.با هورستەو  هەروەرەنە وزمێشەنە دڵێ تۆڕێ ،هەر دۆێ یەرێ کەرتێش حەسێبا . بەڵام با وەڵێنە نەزانۆ.

وێم وست وتەیەرە.واتم ئەی دەرذێ مەرذا وزووگیانتا. دەورو سەعاتیویش پەنە  ویەرد. هورستانیەو، وێم نەوست  ئا دەیرە ،ئینگار نە ئینگار چیوێوم  ئەژنەویەن. نەزانینی چێش کەروو ،تا تۆ زەنگت دا، ئەپا جورە ویم دزیەو چەنەشا .قەسەمم واردەن بە هیچ جوریو توخنیشانەگنوە، بە هیچ جورێو  نەدونوشا. دەی خاسا تو بیەینی چێش کەرێنی؟