ڕواسێوە و حاجی لەقلەقێو جەنگەڵێوەنه‌ هامسای بێنێ. ڕۆێو ڕواسەکێ به حاجی لەقلەقی ماچۆ: حاجی گیان ئارۆ مێمانوو منەنی ته‌شریف باره‌ په‌ی یانه‌یما. حاجی لەق لەق فره‌ وه‌شحاڵ بو و ماچۆ دەی خاسا سه‌روو چه‌ما. ئا ڕوه‌ تا وێره‌گا سه‌یوه‌رێوه‌نه‌ گنۆوه‌پاڵێ و هیچ نمه‌وه‌رۆ. وێرەگا جمۆرە ملۆ پەی یانەو ڕواسێ جه‌ حاڵێوه‌نه‌ که‌ فرە ئاوراشا و تا وێرەگا هیچش نەواردٚەن چوون قه‌رارا یانه‌و ڕواسێنه‌ له‌مێوه‌ سێر و په‌ڕ دوه‌چاشته‌ بوه‌رۆ. ملۆ منیشۆرە. ڕواسە سفره‌ میاوۆره‌ و چاشتێوەی تەڕە که‌رۆنه‌ دلێ ده‌وریێوی پان و ته‌ختی و مارۆ وه‌روو ده‌موو حاجی له‌قله‌قی منیێشه‌ره‌ و په‌ی وێچش هه‌ر پاسه‌ که‌رۆ. حاجی له‌قله‌قی به‌سه‌زوان هه‌رچی ده‌نووک مدٚۆ ئه‌و ده‌وری،هیچ فایدٚه‌ش نیا و نمه‌تاوۆ چاشته‌کێ بوه‌رۆ به‌ڵام ڕواسه‌کێ به‌ زوانش ده‌وریه‌که‌ی ملێسۆوه‌ و هیچش نمازۆ. حاجی له‌قله‌ق بە دڵی هاڵی ملۆوە پەی یانەکەو وێش. ئاورایێ وەرمش مەگنۆ پۆرە تا ساعبێ ویرێ کەرۆوە چەنی هه‌قه‌و‌ وێش جه‌ ڕواسێ بسانۆ. تا فکرێوی عال مه‌ی سه‌ره‌شه‌ره‌ و و ساعبێ زوو ملۆ ته‌قه‌ مدٚۆ یانه‌و ڕواسێ و ماچۆ کاکه‌ ده‌ست وه‌ش بۆ په‌ی مێمانیه‌که‌یت. منیچ گه‌ره‌کما عێوه‌زات ده‌ووه‌ و مێمانیت که‌روو. ڕواسه‌ دڵوو وێشه‌نه‌ به‌ بێ ئه‌قڵی حاجی له‌قله‌قی خوا و واتش هه‌رچن زه‌حمه‌تا به‌ڵام سه‌روو چه‌ما مه‌منوون جه‌ خوڵکه‌کێت. حاجی لەقلەق لوا ڕۆخانەنە ماساوی وردەڵێش گێرتێ و ئاردێشەوه‌ و که‌ردٚێش که‌باب و وسێشه‌نه‌ دلێ تۆنگێوەی قووڵه‌ی مل باریکه‌. وێره‌گا ڕواسه‌ ئاما په‌ی یانه‌یشا و دماو خێر ئامای و وه‌شی و تشی، سفره‌شا یاواره‌ و ڕواسه‌ به‌ بوه‌و که‌باب ماساوی خه‌ریک بێ، بێ ئه‌ختیار گنۆ واتش به‌ خوا برا ده‌س پۆختت فره‌ عالا جه‌ بوه‌کێشه‌نه‌ دیارا. حاجی له‌قله‌ق ماچۆ ئانه‌ که‌باب ماساوم په‌ی تۆ وه‌ش که‌ردٚه‌ن ئیسه‌ مارووش خزمه‌تت. لوا و تۆنگه‌ش ئاردٚه‌ نیاش وه‌روو ده‌موو ڕواسێ. ڕواسه‌ هه‌ر چیش که‌ردٚ قه‌پۆسه‌ش نه‌لا تۆنگه‌کێره‌ و حاجی له‌قله‌قیچ هه‌یتا هه‌یتا ماساوێو تۆنگه‌کێنه‌ به‌ر ئارێ و وه‌رێ و واچی به‌خوا برا له‌زه‌تیا. ڕواسه‌ وه‌خت بێ شێته‌ بۆ و تۆنگه‌ هاڵیه‌ بیه‌ و ڕواسه‌ به‌ له‌مه‌ی ئاورا گێڵاوه‌ په‌ی یانه‌ی. هه‌که‌ خه‌ریک بێ به‌ره‌نه‌ زیێره‌، حاجی له‌قله‌ق ماچۆ یاخوا خێر به‌ی مامۆ ڕواس به‌ش چاشته‌کێت به‌ دڵ بیێبۆ ئه‌جۆم نه‌ختێو سه‌نگینه‌ بێ. لیوانێو ئاولیمۆ بوه‌ره‌ نه‌کا مه‌سمووم بی.

هۆرئه‌وه‌گێڵنای: ئیبراهیم شه‌مس