بسم الله الرحمن الرحیم
به پێشکهش کهردٚهی سۆز و سڵامێوی ، به بارهسهی هازۆ وهرهتاوۆ هامنوو ههورامانی، به فێنکی شنهو شهماڵوو گهلاوێژوو ههوارهکاو وهڵاتی ، به قرمهو ههوازهو سیاوچهمانهکاو یۆسۆ ئاسکهی و مامۆ هێدٚهری ، به گهورهیی ئیمان و عێرفانوو عهللامهی نۆدشی ، به بۆی وهشهو وهرکهمهروو سهرکهشاو به بهرزی بهژن و باڵاو دهربهنوو شاروو نۆدشهی خزمهتوو مێمانه وهشهویسهکا به تایبهت نویسهرا ، هۆنیارا ، پهیجۆرکهرا و گردٚوو ئا ئازیزا که چێگهنه شانازی مێمانی کهردٚهیشا ئینا سهروو سهرهیماوه.
به ئیجازهو وێتا گهرهکما ڕاپۆرتێو جه یهکۆمین ههمامهو داستانێ کۆتای ههورامیێ خزمهتتانه بوانوهوه.
ویهردٚه :
نهواچیا دیارا که چی دویهر ساڵهنه ، داڵغه و دڵهچرکهو فرهو دڵسۆچنا و گهشاوهزاو ههورامانی ، خهتهروو دلێنه شیهی زوانی ههورامی بیهن و چی لاپلایهنه ههر یاگێو لێڤیابۆ ، خهمهوهرێو پهی گێرتهی ئی کهلهبهرێ و ئهوهسهڕتهی نۆقسانیهکا لاقۆرێوهش هۆرگێرتێنه و کهلوکاروو زوانهکهیش گێرتهنش. مانگۆ سیاکاموو ساڵۆ پاری ههر چی نودشهنه جه گلێرهو (( خۆلێوه چنی شێعرێ )) چهمم کهوت حهز و تاسهو جوانانێوی ئازیزی که چا گلێرهنه ههرمانه کهرێنێ . ئانه ڕاسی بۆ وهش کۆنجه و کۆنجوو دڵیم ئاخهناش و شادٚی بی به چۆپی کێشوو پڵێزوو ژیوایم.
ڕوێو شۆنۆ گلێرهکهی چنی کاکه ئۆمید حهبیبی پهیوهندیم گێرت و واتم به یاردٚی و دهسباری جهنابیت و دۆسهکا تهری پهی گهشهو ترۆقی فرهتهروو ئهدهبیاتوو ههورامانی ههرمانێوه بنهڕهتیه و کارێگهره کهرمێ .چاماوهنه باسوو داستانێ کۆتای ههورامیم ئاردٚهنه وهر . دماو ویارای نهورۆزی به یاردٚی ئازیزا ئۆمید حهبیبی ، عهودڵا حهبیبی و کوورش ئهمینی شاروو پاوهیهنه چنی ڕاوهبهروو ئێڕشادی جهنابوو دۆکتر مهحموودی جهمێوه دۆسانێما ڕێک وسه و نیاماره که پهی وهرگیری جه فهوتیای زوانی ههورامی دویهر بهرنامێ بهرمێ ڕاوه.
دهسپنهکهردٚهی ههرمانێ:
مانگۆ کۆپڕی بنهڕهتوو ههرمانهکێما بڕی و من به نمانهری دۆسا لوانێ خزمهتوو ڕاوهبهروو ئێڕشادی و مۆجهوێزوو ڕاوهلوای ههمامهو داستان کۆتای ههورامی گیریا. به پاو ئانهیه نۆدشه پێسه یاگهکا تهروو ههورامانی، شارێو به ویهردٚێوی برێقهداری فهرههنگیا و خهڵکێوی فامدار بنهچهق بهرزێش ههنێ ، پهی ڕاوه لوای ههمامهکهی هۆرچنیا . برای ئازیز کاکه عهودڵای حهبیبی وهرپهرسوو ئهنجۆمهن ئهدهبی کتیبیانهو نۆدشهی ههرمانهکێش پنهوهشه بیه و به یاردٚی باقی دۆسا چانیشا مامۆسا مهڵڵا ئهحمهدٚ مۆبارهکشاهی ئیمام جمعه و ڕاوهبهروو کتیبیانهی بنهڕهتوو ههمامهکهی مجیا.
ئهره نیشتێ :
چی ماوهنه گردٚهوه 6 ئهرهنیشتێ جه هۆدٚهو ئهنجۆمهن ئهدهبی نۆدشهیهنه و ههر پاسه چن ئهرهنیشتێ تهرێ جه یاگهکا تهری پهی خاستهر ڕاوه لوای ههمامهکهی گیریای.
هاگادٚاری (فهراخان)
جه هاڵیگای مهجازیهنه هاگاداریهکه دریا و کرژ و کۆڵ جه ئینترنتهنه وهڵا کریاوهبه تهشک و دیامانێو که 60 پهلیانێ و 15 وێبسایتێ هاگاداریهکهشا بهر وس.
بهرههمێ کیانیای پهی ههمامهی
بهرههمێ کیانیای فرهتهر جه تهمهدٚاری ئێمه بێنێ .72 بهرههمێما پهی ئامای. ئهر نهواچوو گردٚوو قهڵهم بهدهساو ههورامانی ،متاوۆ واچوو فرهو نویسهرا چی ههمامهنه بهشدارێ بیێ که ههر چێگهنه دهس وهشیشا چنه کهروو و ئاواتوو سهربهرزیشا پهی موازوو.
داوهرێ
دماو تهکبیر و ڕاوێژێوی فرهی یهرێ داوهرێ که عێلم و وهشنامیشا لاو خامه بهدهساو ههورامانی ئاشکران هۆرچنیهی و گردٚوو داستانهکا که لاو منهوه بێنێ بێ ئینهیه نامێشا پهی کهسی تهری دیاره بۆ دریای دهسوو ههر یهره داوهرهکهی و ئادٚێچێ دماو ئهوهوهنهی و نمره دای ، پانزه داستانێشا پهی ئارۆی هۆرچنیێنێ.
نۆقسانیێ ههمامهی :
چێوێوی ئهوهنهشاریان که ههر ههرمانێوه نۆقسانیێ و کهم و کۆڕێێش چنهنێ و به پهیلوایم تاقانه نۆقسانی ههمامهی نهبیهی یاگێ ڕێکوپێکهپهی ڕاوهبهردٚهیش جه شاری فهرههنگی نۆدشهیهنه بێ که ئاواتهوازهنا وهرپهرسه ئازیزهکێ پهی چار کهردٚهیش قۆڵێ هۆرماڵا.
قوهتی ههمامهکهی :
ههر پاسه که وهڵێچهنه واچیا و گردٚ بنیادٚمێوی ژیر یاوانشهنه زوانی ههورامی بهواتهو پێکوزیاو یۆنسکۆی یۆ چا زوانانه که سهراوچیری دلێنهشیهی . پی ئاژهوه که پهوشهوه دیارا، لێژی خهڵاتشاو ئی ههمامهو داستانێ کۆتای ههورامیێ گهورهتهرین کارێگهری و شۆنهماش بڕهو دایا به نهسر و پهخشانی ههورامی.
ئێمه ویرما چانهیه کهردٚهنهوه که ههر پاسه گردٚ ساڵێو جه بانهنه داستانێ کۆتای کوردیه ، جه مهریوانهنه شانۆ سهروو جادٚهی و جه سنهنه شێءرێ نهوی کوردیه ملۆ ڕاوه ، خوا بارۆ وهرهوه جه نۆدشهیچهنه گردٚ ساڵێوه ههمامهو داستانێ کۆتای ههورامیێ بلۆ ڕاوه و من دڵنیانا چانهیه جه دماڕۆنه خاستهر جه ئیسهیچه گیریۆ.
ئا ئێدارێ که پهی گێرتهی ههمامهکهی پاڵپشتێما بیێ و پهشتی گێرتهیشا یاگۆ سپاس و پنهزانایا :
جه نابوو دۆکتر ههدایهت مهحموودی ڕاوهبهروو ئێدارهو ئێڕشادوو شارهسانوو پاوهی 2- شارهداروو شاروو نۆدشهی جهنابوو ئاغهی ئهحمهدی و ههر پاسه شۆرا وهشهویسهکێ ئی شاریه 3- جهنابوو ئاغهی سالم مۆستهفایی بهخشدار و ههر پاسه جهنابوو ئاغهی ئهحمهدی ڕاوهبهروو نههادوو کتیبیانه گردهکاو پارێزگاو کرماشانی .
ئهر چی من به نامی ڕاوهبهروو ههمامهکهی بێنێ بهڵام ئینه ههرمانێوه جهمیه بێ که چێگهنه یاگێشهنه سپاسوو گهورهیی مامۆسا مهڵڵا ئهحمهد مۆبارهکشاهی کهروو . ههر پاسه ئاغهی عهودڵا حهبیبی وهرپهرسوو ئهنجۆمهن ئهدهبی ، مامۆساو وێم ئازیزوو ههورامانی کاکه ئۆمید حهبیبی که دایمه دهره ڕانموونیهکێش پهی من دڵوهشکهرێ بیێنێ . جه دماینهنه سپاسوو داوهره وهشهویسهکا : کاکه کوورش ئهمینی ، کاکه کامیل سهفهریان و خاتوو بهدری شهریفیانێ کهروو که مهینهتێ فرێشا به گیان ئهسهی و دۆسی وهشهویسم جهنابۆۆ کاکه ڕهحمهت مۆحهمهدی که به ڕاسی مهرارهتی فرهش پهی ههمامهکهی کێشت.
دما ئاخرهوه سپاسوو خوای گهورهی کهروو که ئینایمێ یاگێوهنه ئهمنیهت بهرقهرارا و متاومێ به زوانهکهیما قسێ کهرمێ و بنویسمێ .
به ئاواتهو سهربهرزی ههورامانی
ئیبراهیم شهمس
ڕاوهبهروو یهکۆمین ههمامهو داستانێ کۆتای ههورامیێ نۆتشه گلاوێژوو 1392ڕۆجیاری
